Poesia di (Luigino Pagliuso)

Aiére, òie... e craie


Allongato 'ngoppa a 'na montagna
abbrazzato da acqua e campagna,
pare ca 'na mano là l'appoiato
mill'anne fa, e mo' l'ha lassato.
Chi lo creavo forse era normanno
ca qua scinnivo, no' 'nze sa quanno,
e pe' se defende da quacche "mammone"
'mbalavo le pprete de lo terreone.
Passa lo tiempo e lo paese cresce
puro la ggente, ca da qua nonn' esce,
passa lo tiempo, currono l'anne
a Fontana nova se ne lavano panne.
Nnant' a le pporte, 'ngoppa a le segge
chi canta, chi sona, chi fatia e chi legge,
e quanno se prea a nostro Signore
scaoze, afflitte e 'mmano lo core.
'Mmiezz'a la via se pazzea e se corre
lo strummolo gira sott'a la torre,
se joca a lire, s'aoza poreva da terra
'no striscio pe' cielo e finisce la vuerra.
Passa lo tiempo e lo paese cresce
puro la ggente, ca da qua nonn' esce,
passa lo tiempo, currono l'anne
a Fontana nova se ne lavano panne.
E quanta storie a lo moraglione,
casa de viecchio e scola a vaglione,
'nganda l'acqua 'na vecchia ianara
tronere, lampe e chien' a ghiomara.
De tutto se parla 'ngopp' a la chiazza,
cunte, cofecchie e scorce de migliazza,
la fera s' abbìa a matutino sonato
se spanne, se spenne e se face mercato.
Passa lo tiempo e lo paese cresce
puro la ggente, ca da qua nonn' esce,
passa lo tiempo, currono l'anne
a Fontana nova se ne lavano panne.
Dint' a le case 'na radio stutata,
no' canta, no' parla, l'anno commigliata,
lo ffuoco 'nfoca, sckoppa lo ceppone
arrivono le bittune de la televesione.
Ce face vedè paise lontane
solde, fatìa, 'mboste e petane,
me ne vavo, ma', me n'aggia ì
e no' 'saccio si torno a vinì.
Passo lo tiempo, lo paese ha crisciuto
la ggente, però, da qua se n'ha 'gghiuto
passa lo tiempo, currono l'anne
le spine hanno chiuso la via... pe lavà le panne.

 
(Luigi Pagliuso)